Priiuse poole

 

Kae, üits miis rulatass,

endäl abenin alli karva!

Kõneldass: temä ollu

repressiivorgani tüüriist.

 

Vabadus nink priiuss

omma ütesuuru.

 

Küll Peräline tule, mõist

kõik õige nink essünü

söögist ja süist valla,

priist priimbass.

 

Osade jaotuss

 

Ilm kõvaste kõnelass,

tuul vällän valiste puhk.

Satass räissä nink lumme,

kinni matetu tuki nink tuhk.

 

Karjalauda varemin

kass roit, like vurr nink käpp.

Üits laits aknast vaht vällä,

suvve unetadu näpp.

 

Peni ähkätäss köögin lavva all.

 

 

Endämisi

 

Oman kooban ist inemine

endä sehen.

Temä illuss eng, terve elu

om katen lehen.

 

Täl kooluse kõndva meelen,

õigust takan aava.

Minevik jahtuma nakass.

Kuum ent olevigu laava.

 

Ei meeleperäst juuki

kruusin ega kannin.

Täis tuld nink tõrva

valatu aja annum.

 

Ultrahelü

 

Mätsak miis sais ilma vastan,

süä kale nink amba risti.

Perätu maailm kitt tälle:

täämbätsest su tii om pisti!

 

Valguse pudsaja lehvvä

pää kotsil rõõmu nink vaiva.

Kiä olet, tuud selgess ei saaki.

Enge välk juusk üle taiva.

 

Sa peräkõrd kleebit silte:

sina sääne — a temä määne!

Sinul saapa, tõne kand känge.

Mõlemba täis kääne nink vääne.

 

Mes massva kõik sildi tan melun,

kon jo tulevik ohvriss tuudu?

Ei noh, iks edesi trampi elun!

Päivlik tiirutass vanna muudu.

 

 

Positiivne pilt

 

Mingikõrd sündmuste palgel

paistuss ku läbi lume.

Mälestuse pleegitu aja valgel,

alal oitnu na lõhna, jume.

Miil elgiss ku linane kangass.

Ärä muutnu, mes must nink tume.

Miil elgiss ku linane kangass.